ᒫᓐᓇᕈᓘᓚᐅᖅᑐᖅ ᑭᓯᐊᓂ, ᐃᓄᐃᑦ ᖃᐅᔨᒪᓂᖏᑦ ᐊᑐᕐᓯᒪᔭᖏᓪᓗ ᐱᓯᒪᔭᐅᓕᑕᐃᓐᓇᓚᐅᖅᑐᑦ ᐅᓂᒃᑳᕆᔭᐅᕙᓪᓕᐊᓕᖅᑐᑎᓪᓗ ᑕᕝᕘᓇ ᑭᓯᐊᓂ ᑲᒪᒋᔭᐅᓕᕐᒪᑦ ᐅᓂᒃᑳᑦ ᐱᖅᑯᓯᕆᔭᐅᓯᒪᔪᓂᒃ.
ᑕᕝᕘᓇ ᓴᓐᖏᓂᖃᑦᓯᐊᑐᒃᑯᑦ ᐊᐅᓚᔾᔭᑦᑕᐅᓯᒪᓂᖓ ᒫᓐᓇ ᐱᓕᕆᐊᖑᔪᖅ ᑎᒍᓯᔾᔪᑕᐅᓂᐊᖅᑐᖅ ᐅᓂᒃᑳᓂᒃ ᖃᐅᔨᒪᓂᕆᔭᖏᓐᓂᒃ ᐱᓯᒪᑦᓯᓪᓗᐊᑕᖅᑐᑦ – ᐃᓄᐃᑦ ᐃᓐᓇᖏᑦ – ᓄᖑᕋᓚᐅᓐᖏᓐᓂᖏᓐᓂ, ᐃᓚᐃᓐᓇᖓ ᐊᑐᖅᑕᐅᖃᑦᑕᕐᓯᒪᔪᓂᒃ ᑐᓴᕈᑎᓕᐊᖑᓯᒪᔪᑦ ᐃᓱᒪᑐᔪᒻᒪᕆᐅᔪᓂᓪᓗ ᓂᐱᓕᐅᖅᑕᐅᓯᒪᔪᑦ ᐅᓪᓗᒥᒧᑦ ᖃᑦᓰᓐᓇᑯᓗᐃᑦ.
2003-ᒥ, ᓄᓇᕗᑦ ᑐᓐᖓᕕᒃ ᑎᒥᖓᑕ ᑲᑎᒪᔨᖏᑦ ᐊᖏᕈᑎᖃᓚᐅᖅᑐᑦ ᐱᖁᔨᕗᖔᕈᑎᒃᑯᑦ ᐅᓂᒃᑳᓂᒃ ᓂᐱᓕᐅᕆᖃᑦᑕᖁᔨᓪᓗᑎᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓕᕆᕙᓪᓕᐊᓂᒥᓂᕐᓂᒃ. ᑲᑎᒪᔨᑦ ᑐᓐᖓᕕᒃᑯᓐᓂᒃ ᑲᒪᒋᐊᒃᓴᐅᑎᒋᖁᔨᓚᐅᖅᑐᑦ ᓂᐱᓕᐅᖁᓪᓗᒋᑦ ᐊᑐᖅᑕᐅᖃᑦᑕᕐᓯᒪᔪᓂᒃ ᐅᓂᒃᑳᑎᑦᓯᓗᑎᒃ ᓄᓇᑖᕐᐸᓪᓕᐊᓂᕐᒧᑦ ᐊᐃᕙᓂᐅᖃᑦᑕᕐᓯᒪᔪᓂᒃ ᐋᔩᕋᕐᓂᐅᖃᑦᑕᕐᓯᒪᔪᓂᓪᓗ ᑕᒪᒃᑯᐊ ᐊᑐᕐᓇᑐᒻᒪᕆᐅᔪᑦ ᐱᖕᒪᕆᐊᓗᐃᑦ ᑲᓇᑕᒥ ᐊᑐᖅᑕᐅᓯᒪᓂᖓᓂᒃ ᐃᓕᓴᕆᔭᐅᓯᒪᔪᑦ ᔭᒑᓐᖏᓐᓂᖏᓐᓂ.
ᑕᕝᕗᖓ, ᑐᓐᖓᕕᒃᑯ ᑲᑎᒪᔨᖏᑦ ᑮᓇᐅᔭᖅᑑᑎᒃᓴᓂᒃ ᑐᓂᓯᓯᒪᓕᓚᐅᖅᑐᑦ ᐱᓕᕆᐊᖑᖁᓪᓗᒍ. ᑐᓐᖓᕕᒃᑯᑦ ᓄᓇᕗᑦ ᒐᕙᒪᒃᑯᖏᓐᓂᒃ ᕿᓄᕕᖃᓚᐅᖅᑐᑦ ᑮᓇᐅᔭᖅᑑᑎᒃᓴᑲᓐᓂᕐᓂᒃ ᑐᒃᓯᕋᖅᑐᑎᒃ. ᑖᒃᑯᐊ ᑮᓇᐅᔭᖅᑑᑎᒃᓴᑦ ᐊᑐᐃᓐᓇᕈᖅᑕᐅᓕᓚᐅᖅᑐᑦ ᓂᐱᓕᐅᕆᔾᔪᑎᒃᓴᑦ ᐊᒻᒪᓗ ᑎᑎᕋᖅᑕᐅᕙᓪᓕᐊᒍᑎᒃᓴᖏᓐᓄᑦ ᓂᐱᐅᓕᐅᒐᑦ ᐅᓂᒃᑲᐅᓯᓂᒃ ᐱᕙᓪᓕᐊᓯᒪᓂᖓᓂᒃ, ᐊᐃᕙᔾᔪᑕᐅᓂᕆᓚᐅᖅᑕᖓᓂᒃ ᐊᒻᒪᓗ ᐱᓐᖑᖅᑎᑕᐅᓂᕆᓚᐅᖅᑕᖏᓐᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ.
ᑖᒃᑯᐊ ᐱᓕᕆᐊᖑᓚᐅᖅᑐᑦ ᓴᖅᑭᖅᑕᐅᔪᑦ ᑕᕝᕙᓂ ᐃᑭᐊᖅᑭᔾᔪᑎᒥ ᐃᓄᒃᑎᑐᑦ, ᖃᓪᓗᓈᑎᑐᑦ ᐃᓄᐃᓐᓇᑐᓪᓗ ᓴᖅᑭᖅᑕᐅᒋᐅᑦᓯᐊᖅᑐᑎᒃ ᓯᕗᓪᓕᐹᑦᓯᐅᒥ. ᑕᕝᕙᓃᖃᑕᐅᒻᒥᔪᑦ ᐃᑭᐊᖅᑭᔾᔪᑎᒥ ᐅᕙᑦᓯᐊᕈᕐᓂᓴᐃᑦ/ᐃᑦᑕᕐᓂᓴᑦ ᐊᔾᔨᓕᐅᖅᑕᐅᖃᑦᑕᖅᑐᒥᓃᑦ ᐊᐃᕙᓂᐅᖃᑦᑕᓚᐅᖅᑐᓂ. ᑐᓐᖓᕕᒃᑯᑦ ᐸᕐᓇᐅᑎᓖᑦ ᓴᖅᑮᓛᕐᓂᐊᓂᕐᒥᓂᒃ ᐱᓕᕆᐊᖑᑎᓪᓗᒍ ᐊᑎᖏᓐᓂᒃ ᑖᒃᑯᐊ ᐊᔾᔨᓐᖑᐊᓃᑦᑐᑦ ᐱᔪᓐᓇᕐᓯᒍᑎᒃ ᒫᓐᓇᒫᖑᓂᕐᓴᖅ. ᑐᓐᖓᕕᒃᑯᑦ ᐸᕐᓇᒻᒥᔪᑦ ᓴᖅᑮᓛᕈᒪᓪᓗᑎᒃ ᓂᐱᓕᐅᖅᑕᐅᓯᒪᔪᓂᒃ ᐅᓂᒃᑳᕐᓯᐅᖅᑕᐅᖃᑦᑕᓚᐅᖅᑐᓂᒃ ᐊᐱᖅᓱᖅᑕᐅᓪᓗᑎᒃ ᑲᑎᖅᓱᖅᑕᐅᓚᐅᖅᑐᓂᒃ ᐃᖅᑲᓇᐃᔮᖑᑎᓪᓗᒋᑦ ᑖᒃᑯᐊ.
ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒃᓴᖅ:
ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ
questions@tunngavik.com
1-888-646-0006
867-975-4914
